Првиот пациент кој ја примил руската персонализирана вакцина против рак „Неонковак“ завршил со третманот, а на последователните прегледи претходно откриените метастази повеќе не биле забележани. Според руските научници, ниту во четирите месеци по завршувањето на терапијата не биле откриени нови туморски промени.
Информацијата ја соопшти академикот Александар Гинзбург, научен директор на Центарот „Гамалеја“. Станува збор за пациент со меланом, кој бил лекуван со персонализирана вакцина базирана на mRNA технологија.
Вакцината се подготвува индивидуално за секој пациент, врз основа на генетските карактеристики на неговиот тумор. Целта е имунолошкиот систем да ги препознае и нападне малигните клетки.
Пациентот и понатаму е под редовен медицински надзор. Секој месец се вршат детални испитувања, меѓу кои и компјутерска томографија со висока резолуција, при што посебно се следат лимфните јазли и евентуалната појава на нови туморски промени.
Следењето ќе продолжи во наредните три години. Гинзбург нагласил дека сè уште е рано да се донесат конечни заклучоци за долгорочната ефикасност на терапијата.
Според објавените информации, вакцината досега ја примиле шест пациенти, а планот е до крајот на годината третманот да го добијат вкупно 20 лица.
Важно: Станува збор за првични резултати кај еден пациент, а не за доказ дека вакцината е ефикасна кај сите пациенти со рак.
- 01
- 02
- 03
- 04
- 05
