Страшна трагедија го потресе романскиот град Талмачиу, во округот Сибиу, каде две мали деца, момче на четиригодишна возраст и неговата двегодишна сестричка, го загубиле животот откако се затруле со чад во семејниот дом.
Според информациите што ги пренесуваат романските медиуми, несреќата се случила во вечерните часови, кога електрична греалка најверојатно предизвикала палење на ткаенини во просторијата. Огнот потоа се проширил и на дел од душекот, создавајќи густ чад.
Околу 19:30 часот службите за итна помош добиле повик дека една од просториите во куќата е исполнета со чад. Мајката во тој момент се наоѓала во друга просторија од домот.
Спасувачките екипи ги пронашле двете деца во бессознание, без нормални знаци на дишење и срцева активност.
Медицинските екипи веднаш започнале реанимација, која траела приближно еден час. И покрај големите напори на лекарите, двете деца не успеале да преживеат.
Соседите раскажале дека непосредно пред несреќата ги слушнале децата како си играат, што дополнително ја зголемило болката во локалната заедница.
Според медиумските извештаи, мајката претходно била жртва на семејно насилство и сама се грижела за своите две деца.
Градоначалникот на Талмачиу, Јоан Оанча, изразил длабоко жалење поради трагедијата, истакнувајќи ја и опасноста од неправилна употреба на грејните тела во зимскиот период.
Телата на децата биле предадени на судска медицина за обдукција, а полицијата започнала постапка за утврдување на околностите под кои се случила несреќата, поради сомнение за предизвикување смрт од небрежност.
Надлежните институции продолжуваат со истрагата за да се утврди точната причина за пожарот и трагичниот исход.
- 01
- 02
- 03
- 04
- 05
