Еврокомесарот Јоханес Хан, во понеделник, оцени дека излегувањето на една земја од членството во ЕУ не значи дека е запрен процесот на ширење на Унијата, туку дека постојат многу причини тој да продолжи, јави Танјуг.
Отворајќи го Бизнис форумот во рамки на Самитот за Западен Балкан во Париз, Хан нагласи дека и натаму постои европска перспектива за земјите од Западен Балкан, и покрај фактот што ЕУ влезе во тешка фаза.
„Тоа што сме соочени со излез на една земја не значи дека е крај со процесот на ширење, туку, напротив. Има многу причини за ширење на ЕУ, а Европската комисија е определена да го продолжи овој процес“, нагласи Хан.
Според него, засилувањето на агендата за инфраструктурно поврзување на земјите од регионот претставува значајна можност за натамошно поттикнување на соработката, како и за подобрување на околностите за инвеститорите.
Хан смета дека пристапниот процес не е само усогласување на законодавствата, туку е фокусиран и врз областа на економијата, односно врз економскиот раст и поттикнување на конкурентноста.
Во пристапниот процес, многу се важни владеењето на правото и економскиот развој, додава Хан.
Вели дека земјите од Западен Балкан и натаму се соочени со одредени проблеми на товар на минатото, но дека повеќето земји прикажаа јасна приврзаност кон реформи.
Порача дека сите влади треба и во следниот период да преземат конкретни чекори во тој правец.
