Македонската кошаркарска репрезентација го запиша вториот пораз во квалификациите за пласман на Европското првенство, пораз кој ја оддалечува од настап на континенталниот шампионат.
Македонија, во средата во Кавадарци, загуби од Унгарија 66-76 (17-15, 18-17, 13-16, 18-28).Кошаркарите го загубија мечот во кој немаа право на грешка, додека Унгарците со триумфот во Кавадарци со „една нога“ се на Европското првенство.
Играта на Македонија во првото полувреме може да добие преодна оцена, одбраната функционираше добро, нападот задволителен и оттука три поена предност по 20 минути игра.Проблемите за тимот кој го предводи Драган Раца започнаа во вториот дел, македонските кошаркари цели пет минути не постигнаа кош, но ниту Унгарците во тој дел не функционираа најдобро во нападот.
Последните четири минути од третиот период донесоа серија од десет поени најпрвин на Унгарците, а потоа и на Македонија, а гостинската репрезентација успеа на крајот да стигне до 48-48 во пресрет на решавачката четвртина.
Во последните десет минути играта на Македонија целосно се распадна, немаше никава идеја во нападот, Војдан Стојановски не можеше сам, додека на спротивната страна најдобриот играч Војвода доби поддршка од Ханга и Витман кои погодуваа кога требаше ина крајот иѝ донесоа значајна победа на унгарската репрезентација.
Војдан Стојановски со 16 поени ја предводеше Македонија, додека Ромео Тревис забележа 12 поени и исто толку скокови. На спротивната страна доминираше натурализираниот Унгарец Војвода со 27 поени, Ханга уфрли 15, а Витман 11 поени.
