По лошо ќе се сеќаваат на посетата на Софија минатата недела Немања (36 години) и Снежана (30 години) Милошевиќ, откако на паркинг пред “Џамбо” сред бел ден за само 3 минути им бил украдено возилото Kia Sportage.
Семејството од Ниш веднаш пријавило во полиција, но воопшто немале надеж за враќање на автомобилот.
Немања тргнал во неделата со неговата сопруга за Софија, од каде требало да купат за неговата мајка цитостатик коj се користи за хемотерапија, кој е поевтин во Бугарија. На враќање, тие одлучиле да одат во продавница за играчки пред која што го паркирале нивниот автомобил, пишува српски Вечерње новости.
Кога само по неколку минути се вратиле кај својот автомобил, тие виделе дека го нема.
“Ме смири тоа што сè се случи многу брзо и знаев дека нема повеќе од пет литри во резервоарот – изјави Немања. “Се надевав дека полицијата ќе може лесно да ги фати крадците. Но, она што не го очекував е Бугарите да реагираат бавно. Тие пристигнаа “само“ по половина час, и едвај успеавме да ги измолиме и убедиме да испратат патрола за да го проверат случајот. ”
Според зборовите на Снежана и Немања полицајците не ги ни прашале за каков автомобил станува збор, ниту кои се броевите на табличките. Им рекле дека треба да одат во полициската станица и таму да ги пополнат податоците за автомобилот.
“Тогаш ми стана јасно дека повеќе нема да го видам мојот автомобил”, изјавил човекот од Ниш.
Во администрацијата поминаа часови. Околу полноќ тие првин не прашаа за моделот на автомобилот, но не можеа веднаш да го објават за потрага, бидејќи нивниот шеф не бил во станицата. Дури на третиот ден полицијата го пријавила случајот во Интерпол, вели Немања.
“Апсолутно никој во полициската станица онаа вечер не го интересираше каде ќе ја поминеме ноќта, ниту дека станува збор за една бремена жена, вели Немања. “Дури и чаша вода не и дадоа, ниту стол да седне. За среќа носевме со себе картички и имавме малку пари, за да платиме за ноќевање, инаку веројатно ќе останевме на улица “, објаснува мажот.
Ситуацијата на Снежана и Немања дополнително се искомпликувала поради тоа што нивните пасоши им останале во автомобилот и двајцата не можеле да ја напуштат Бугарија.
“Моравме да почекаме за да ни направат патни листови. Амбасадата ни помогна да го сториме тоа за 24 часа. Зедоа предвид дека жена ми е бремена, дека дома имаме мало дете, инаку се чека по една недела и во тоа време не може да се напушти земјата “, вели Немања.
