Вчера на празникот 1-Мај, средовечна жена од скопското село Драчевица е осомничена дека со секира го убила својот сопруг, информираше во четвртокот Министерството за внатрешни работи.
Во текот на вчерашниот ден околу 14,52 часот во СВР Скопје, 45-годишниот П.И. од селото Драчевица, скопско, пријавил дека го пронашол неговиот 54-годишен братучед С.И. усмртен со удари од секира. Според пријавеното, тој претходно ја видел 51-годишната Ф.И., сопруга на С.И., како со секира во рака излегува од куќата на нејзиниот сопруг.
Смртта ја констатирал лекар од Итна медицинска помош. Полициски службеници излегле на местото на настанот и во куќата на нејзините родители ја пронашле Ф.И.. Таа била лишена од слобода и задржана во Полициската станица Кисела Вода.
По наредба на Јавен обвинител телото на С.И. е предадено за обдукција во Институтот за судска медицина во Скопје. Се работи на целосно расчистување на случајот.
