Компанијата Римац Аутомобили на хрватскиот претприемач и иноватор Мате Римац, вчера соопшти дека стана мнозински сопственик на Бугати, познатиот француски произведувач на хиперспортски автомобили.
Објавата на оваа вест, Мате Римац ја пропратил со фотографија на Фејсбук која прикажува модели на Римац, Бугати и Порше на тркачка писта.
Како што се наведува, сите акционери ги задржале постоечките удели во сопственост на Римац. Мате Римац е и понатаму поединечно најголемиот акционер со 37 отсто удел, Порше има 24 отсто, а следуваат Хјундаи со 12 и останатите акционери со 27 отсто сопственички удел.
За само 12 години постоење, компанијата Римац Аутомобили од стартап компанија со еден човек во гаража стигна до мнозинско сопствеништво над легендарниот Бугати.
Започнал од нула со многу среќа
Мате е роден 1988 година како најстар од 3 деца. Неговата мајка била чистачка, а татко му градежен работник во Германија. Дури во 2000 година се преселиле во родниот Самобор каде основале семејна фирма.
Според сопственото признание, Мате бил просечен, па дури и ученик под просекот. Отсекогаш го интересирала електроника и автомобили и на натпреварите од тие области освојувал прво место.
Неговата прва иновација била ракавицата „iGlove“ која заменува маус и тастатура на компјутери, а ја направил како матурска задача. Уште како дете бил фасциниран од автомобили, па станувал околу 4 часот наутро за да гледа Формула 1 трки. Подоцна започнал да вози дрифт трки со своето старо зелено БМВ, а кога во една прилика му се запалил бензинскиот мотор, Римац сфатил дека мора да ја реализира својата долгогодишна желба и да направи електричен автомобил.
По многу напор и одрекувања, успеал да го оствари сонот – на една улична трка во 2010 година, неговото електрично БМВ ја победил бензинската конкуренција, а една година подоцна соборил 5 Гинисови рекорди за забрзување на електрични автомобили.
Дотогаш за Мате сè било хоби, а потоа одлучил да направи бизнис од сето тоа, при што многу делови не постоеле и морал сам да ги осмисли.
Тогаш тој и дизајнерот Адриано Мудри одлучиле да создадат потполно нов автомобил во гаражата на Римац, со што Адриано бил задолжен за дизајнот, а Мате за технолошката страна. Поради успехот кој Мате го имал на трките, тој го привлекол вниманието на медиумите бидејќи било несекојдневно едно старo електрично БМВ да покори бензински автомобили со неколку стотици, па и над илјада коњски сили.
Ваквото внимание довело до тоа да му се јави еден Хрват кој работел за едно кралско семејство од Блискиот исток чија задача му била во нивно име да бара интересни проекти во кои тие можат да инвестираат.
Кралското семејство сакало да купи прототип од нивниот прв автомобил и бидејќи на крајот не успеале да се спогодат околу сите услови, автомобилот бил претставен во 2011 година на најголемиот саем на автомобили во светот, во Франкфурт.
Неговиот електричен автомобил бил дочекан со воодушевување, а првиот сериозен инвеститор бил Колумбиецот со хрватско потекло, Франк Кристијан Канајет. Тогаш започнале да пристигнуваат и првите нарачки, а бизнисот на Римац започнал вртоглаво да расте од година во година.
