Шејла Хендерсон (33) од Охајо пораснала со Ненси и Џими, парот кој ја посвоил кога имала само 10 месеци.
Иако сите мислеле дека Шејла била дадена на посвојување поради лошата финансиска состојба во нејзиното семејство, дури пред некое време била откриена вистинската причина зошто била одвоена од своето биолошко семејство.
“Цел живот ми велеа дека мајка ми ме оставила поради лошата финансиска ситуација во семејството. Меѓутоа, тоа не е вистина. Моите родители биле во брак и имале уште една ќерка. Сестра ми имала три години кога сум се родила јас. Кога сум наполнила еден месец, татко ми ја исфрлил мајка ми на улица, а мене ме дал на посвојување. А, логично, сестра ми ја задржал. Кога после еден месец мајка ми се смирила со него и се вратила дома, дознала дека мене веќе ме нема. Не можела да верува”, раскажала Шејла за Дејли Меил.
Кога мајка ѝ отишла во агенција за посвојување за да ја врати својата ќерка, ѝ рекле дека “мора да плати”. После еден месец се вратила со потребните пари и девојчето им било вратено на родителите. Но, на нивната заедничка среќа ѝ дошло крај после само еден месец.
“Татко ми повторно ме дал на посвојување. Мајка ми се вратила во агенцијата, собрала пари за да ме врати, но било предоцна. Веќе ме посвоиле. Мајка ми останала уште 27 години со татко ми. Годините неа и на сестра ми им поминувале во солзи и желба нивното бебе да се врати дома. Покрај сето тоа што го поминувале со мене, мајка ми и сестра ми биле сериозно злоставувани од татко ми. Мајка ми собрала сили да го остави дури пред 7 години, а потоа почнала потрагата по мене”, објаснила Шејла.
Тие три неодамна повторно се прегрнале, после повеќе од 30 години.
