За туристите на Бали вистинска мистерија е како напуштен авион се нашол среде ливада која од локалната плажа е оддалечена на само пет минути.
Напуштениот „боинг 737“ станал вистинска туристичка атракција, пренесуваат локалните медиуми. Поради тоа што авионот нема никакви ознаки и симболи сосема е нејасно дали претходно и припаѓал на некоја авиокомпанија.
Според некои тврдења, авионот долго време бил на тоа место, само претходно го криеле големи контејнери за испорака, наредени околу него. Други, пак, велат дека авионот требало да се претвори во ресторан, но сопственикот останал без пари и се откажал од таа идеја.
Сега пред него се поставени врати, а го чува и обезбедување. Туристите кои сакаат да го посетат авионот мора да платат билет, а само мал број луѓе може да се качат во него. Неколку посетители и блогери се обиделе да се приближат до него, но безуспешно.
Без информации за потеклото и приказната за судбината на патниците и персоналот кои ги превезувал, овој авион останува вистинска мистерија за посетителите на Бали.
