Почетокот на мај, а во планинските области и до крајот на мај е идеално време да се соберат зелени плодови (незрели Juglandis fructus) од кои се подготвени разни лековити препарати.
Зелените млади ореви се редок природен резервоар на витамин Ц и фенолни состојки. Тие се богати со минерали, како јод, калиум, магнезиум, фосфор, калциум, железо, цинк, хлор, сулфур, манган и бакар.
Покрај тоа што се богати со витамин Ц, тие изобилуваат и со други витамини (Е, Б1, Б6, Б9) и омега-3 масни киселини, па затоа препаратите направени од зелени ореви се даваат на неухранети и анемични деца. На Балканот и ден-денес се одржува овој убав обичај да се подготвуваат младите зелени ореви во мед како сируп, во алкохол како тинктура, во ракија и шеќер (или мед) како лековит ликер итн.
Лековитите препарати од зелени ореви се користат да се подобри ефикасноста на тироидната жлезда, да се исчисти крвта од отрови и паразити од телото, да се олеснат желудочните тегоби и секако да помогнат при спречувањето на парадентоза.
Според нас, најздравата варијанта за подготовка на млади зелени ореви е комбинацијата на мед со истите, без никаква термичка обработка.
Подготовка на лекот:
- Најпрво наберете оревчиња со должина од околку 1-1,5см, најубаво би било да ги наберете од дрво кое расте во еколошки чиста средина, каде што воздухот, водата и почвата не се загадени. Ставете ги во тегла и прелијте ги со медот.
- Затворете ја убаво теглата и оставете ја на светло место, но не ја изложувајте директно на сонце.
- На секои десетина дена, отворете го капакот за да излезе воздухот кој е производ на ферментацијата која се одвива во теглата и промешајте го сирупот.
- После 40-тина дена, процедете ја течноста и отстранете ги малите оревчиња, кои веќе се црни и суви (како на сликата погоре).
Напомена: Најдобро е оревчињата да бидат со големина 10 – 15мм, бидејќи сирупот направен од поголеми ореви е со неподносливо горчлив вкус.
Се препорачува да се зема по 1 лажичка дневно, за да ги обезбедите дневните потреби за јод во вашиот организам.