По примерот на хрватскиот остров Хвар, кој преку оглас вработи лекарка од Македонија, и другите хрватски острови бараат сезонски работници на кои им се нудат добри плати, забава и бонуси. Тие преку необични и интересни огласи се обидуваат да привлечат што поголем број заинтересирани за сезонска работа на островите во наредните седум месеци.
Наутичкиот центар Комижа на островот Вис бара работници. Тие на „Фејсбук“ објавија повеќе огласи во потрага по работници. Нудат плати кои не се лоши, но и сместување и можност за награди.
Еве некои од нивните реклами за работа:
Продавач на сувенири и билети за Сината пештера на островот Бишево: За многумина оваа понуда ќе звучи примамливо ако се знае дека платата е над 1 000 евра, а обезбедено е и сместување на сончевиот Вис.
,,Хигиеничар или хигиеничарка – сеедно е само да ни се приклучи и да биде наш сезонски работник ова лето, а ние ќе го наградиме со плата до 800 евра и со обезбедено сместување. За највредните има можност и за договор за ,,зимска плата” (статус на постојан сезонец)”, се наведува во еден од огласите.
,,Снаодлив си, комуникативен и сакаш да запознаваш туристи од целиот свет. Ако одговорот е ДА, тогаш идеален си за кандидат за работа како келнер на островот Бишево. Имаш обезбедено сместување, екипата е одлична, бакшишот врвен, а платата достигнува и над 1 000 евра”, се наведува во друг оглас.
Оние што ќе го одработат успешно пробниот рок, ќе останат да работат на островите во наредните 7 месеци.
