Голден Стејт успеа да избори „мајсторка“ против Оклахома, во финалето во Западната конференција, откако на теренот на противникот славеше 108-101 и го израмни резултатот на 3-3. Клеј Томпсон со брилијантна партија го предводеше шампионот, тој постигна 41 поен, од кои рекордни во плејофот 11 тројки.
Голден Стејт, пред два натпревари беше на работ на елиминација, но со две победи успеа да избори седми меч против Оклахома. Домаќнот на шестиот меч, Оклахома, имаше константна предност од пет до девет поени, во текот на целиот натпревар, но во финишот шампионите направија пресврт. Во последните две минути, период во кој Кари постигна две а Томпсон една тројка, Голден Стејт со серија 11-2 го реши натпреварот.
Томпсон постигна 19 поени во последната четвртина, а мечот го заврши со 41 поен (11/18 за три). Брилијантен беше и Стеф Кари, иако не постигна кош во првата четвртина, тој на крајот заврши со 31 поен, 10 скокови и девет асистенции.
Мечот го реши шутот за три поени, Голден Стејт постигна 21 тројка од 44 обиди, додека Оклахома упати 23 удари зад линијата 7,24 метри, а погоди само три тројки.
Оклахома ја предводеа Кевин Дурент и Расел Вестбрук, но двајцата погодија само една тројка од 13 обиди. Дурент постигна 29 поени, а Вестбрук имаше учинок од 28 поени, 11 скокови и девет асистенции.
Решавачкиот седми натпревар, по кој ќе биде познат противникот на Кливленд во големото финале, ќе се одигра во ноќта помеѓу понеделник и вторник во Оукленд.
https://www.youtube.com/watch?v=UjPFq_SOvmg
