Бразилското обвинителство покрена обвинение против пластичниот хирург Денис Фуртадо, поради смртта на пациентка на која и вбризгал инјекција за зголемување на задникот.
Фуртадо, познат во Брзаил како „Доктор бам бам“ што е бразилски сленг за задник, беше уапсен заедно со неговата мајка во јули во Рио де Женеиро, пренесе „АП“.
Тие во својот стан направиле естетски зафат за зголемување на задникот врз 46-годишната банкарка Лилијан Каликстро, која починала неколку часа по операцијата. За убиството освен Фуртадо и неговата мајка Марија, обвинети се и неговата девојка и секретарка Рената Фернандез и домашната помошничка Росилана де Силва.
Во обвинението стои дека докторот, со помош на обвинетите, на починатата пациентка во задникот и вбризгал 300 милилитри метилметакрилат или PMMA, синтетичка смола позната и како акрилно стакло, што е далеку повеќе од дозволената доза. Бразилското друштво на естетски хирурзи на неколку наврати претходно предупредувале за опасноста од таа супстанца.
Фуртадо имал лиценца за две покраини, но не и за Рио Де Жанеиро, каде ги изведувал зафатите. Ако биде прогласен за виновен, би можел да добие 30 години затворска казна.
