Рускиот претседател Владимир Путин во телефонскиот разговор со претседателот на Венецуела, Николас Мадуро, чија земја минува низ политичка криза ја изрази неговата поддршка.
Во разговорот, Путин изјавил дека ги поддржа легитимните власти на Венецуела, во услови на влошување на политичката криза предизвикано од надвор, соопшти Кремљ.
Рускиот претседател го осуди „деструктивното странско мешање” кое ги крши основните норми на меѓународното право.
Тој вети дека ќе побара решение во уставната рамка и надминување на разликите во венецуелското општество преку мирен дијалог.
Мадуро развој на ситуацијата во последниве денови го оцени како опасен и ѝ се заблагодари на Русија за својата принципиелна позиција, се додава во соопштението.
Двајцата водачи притоа ја потврдија и заедничката желба да ја продолжат руско-венецуелската соработка во разни области.
За време на вчерашниот протест, претседателот на парламентот на Венецуела, единствената институција контролирана од опозицијата, Хуан Гуаидо, се прогласи за преоден претседател на државата пред десетици илјади приврзаници во Каракас.
САД, Канада и земјите од Латинска Америка веднаш го поддржаа Гуаидо, а венецуелскиот претседател, Николас Мадуро подоцна објави дека ги суспендирал дипломатските односи со САД и им наредил на американските дипломатски претставници да ја напуштат Венецуела во рок од 72 часа.
