Нехир Илкова била затрупана во Кахраманмараш по силните потреси. Спасиле деветмесечна трудница која поминала 40 часа под урнатините во Турција, јавува aa.com.tr.
Потсетуваме, во понеделникот два силни земјотреси со јачина од 7,8 и 7,5 степени според Рихтеровата скала ја погодија Турција и нејзините погранични области со Сирија.
Следеа десетици последователни потреси, од кои многу се над 5 степени според Рихтеровата скала.
Екипите за итни случаи и волонтерите продолжуваат да бараат луѓе под урнатините.
Жртвите од разорниот земјотрес на турско-сириската граница и последователните последователни потреси надминаа 15.000. Наспроти ова, надежите за пронаоѓање повеќе преживеани се намалуваат со секој изминат час, јави ДПА.
Бројот на загинати во Турција се искачи на 12.391, јави утринава Anadolu Agency, повикувајќи се на турската агенција за одговор при катастрофи и несреќи АФАД, а повредените се 62.914.
Преку границата во Сирија разурната од војна, бројот на загинати изнесува до моментот 2.662. Вчера турскиот претседател Реџеп Таип Ердоган вети дека спасувачките напори ќе продолжат додека „никој не остане под урнатините“. Уништени се околу 6.000 згради, рече тој.
Ердоган вети итна помош од 10.000 турски лири (околу 530 долари) за секое настрадано семејство.
Ситуацијата во Сирија е страшна. Според владините податоци, погодените Сиријци се околу 298.000, а повеќето морале да ги напуштат своите домови, објави државната новинска агенција САНА. Надлежните одвоија 180 места за итно сместување.
Илјадници луѓе во Сирија се уште се водат како исчезнати, а се уште има итна потреба од тешка опрема за расчистување на остатоците. Долготрајната граѓанска војна и меѓународните санкции го попречуваат обезбедувањето помош за погодените области.
Во понеделник наутро, регионот долж турско-сириската граница го потресе земјотрес со јачина од 7,7 степени според Рихтер. Оттогаш, регионот доживеа стотици последователни потреси, вклучително и земјотрес со јачина од 7,5 степени во понеделникот попладне.
