Поврзаноста меѓу компјутерите била со цел да не се носат материјалите и со тоа да не дојде до некакво сомневање дека тука се прават транскрипциите. Тие материјали ги земал логистичар кој бил задолжен да им ги носи на екс директорот на УБК Сашо Мијалков и на поранешниот премиер Никола Груевски.
Со самото тоа што компјутерите биле мрежно поврзани било пресудно свиркачот Звонко Костовски да дојде до тие материјали и да ги преземе. Еден дел од аудио снимките кои биле достапни во мрежата ги преснимил, а обработените материјали кои инаку биле во многу поголем обем ги презел. Транскриптите кои во моментот се изработувале биле достапни преку мрежното поврзување, со што Костовски влегувал во мрежата и преку програмот Autosave кој правел зачувување на материјалите ги копирал. Некои од тие материјали се недовршени, бидејќи системот на зачувување на материјалите се вршел на одреден тајминг, но 90% од нив биле преземени. До Министерството за внатрешни работи поставивме прашање дали е точно дека тој стан им бил доделен од Агенцијата за станбен и деловен простори и дали Управата за безбедност и контраразузнавање го презела за таму да се прават транскриптите, но одговор не добивме.
На сведочењето во Кривичниот суд во четвртокот за случајот со масовното прислушување Таргет Тврдина Костовски изјави дека Зоран Заев бил прислушуван под псевдонимот Зо За. Беше презентиран и меморискиот уред на кој Костовски ги преснимил материјалите од УБК. По сведочењата во судот се огласи пратеничката Фросина Ременски која побара проширување на истрагата.
-За жал, најрелевантните и најиндикативните изјави дадени на Суд од страна на Ѓорѓи Лазаревски и Звонко Костовски се само медиумски популарни, а одговорност не се бара/проширува врз основа на нови сознанија. Зарем ова не е доволен мотив за истражните органи, фактот што зградата на УБК очигледно не била единствената локација за незаконското следење на комуникациите. Зарем не е ургентно прашањето, дали има уште или каде се илегалните гнезда на злоупотребите; Каде се има кабелчиња, кабли, доводи и одводи од системите и базите кој некој ги приватизирал и злоупотребил? Ако чекаме да ни кажат свиркачите (што и така многу направија) имаме проблем – изјави Ременски.
Според обвинението за Таргет Тврдина, преку три системи за следење на комуникациите во УБК во периодот од 2008 до 2015 година незаконски биле следени илјадници телефонски броеви а цел на прислушувањето биле над 20 илјади граѓани. Во овој предмет обвинети се Горан Грујовски поранешен началник на Петтата управа во МВР, Никола Бошковски вработен во УБК кои се и двајцата во бегство во Грција, потоа поранешната министерка за внатрешни работи Гордана Јанкулоска, екс директорот на УБК Сашо Мијалков и неговиот поранешен шеф на кабинет Тони Јакимовски.
