Националното собрание на Венецуела во вторникот ја усвои изјавата за прогласување на претседателот на државата, Николас Мадуро, за узурпатор, а сите одлуки што ги донесоа претседателот и извршните органи ги прогласи за неважечки, објавија локалните медиуми.
„Усвоен е историски документ во кој парламентот ја презема власта врз основа на членовите 233, 333 и 250 од Уставот“, напиша на Твитер претседателот на Националното собрание, Хуан Гуаидо.
Мадуро, од своја страна, вети дека ќе го повика на одговорност Националното собрание, кое е под контрола на опозицијата, за исмевање со Уставот.
„Оние кои сакаат да го исмеваат Уставот слободно нека го прават тоа, правдата ќе ги стигне. Врховниот суд ќе ги стави работите на свое место”, рече Мадуро.
Националното собрание дополнително го засили судирот со Мадуро во вторникот, нудејќи им амнестија на сите од војската што ќе им се приклучат во битката за соборување на венецуелскиот лидер.
„Законот за амнестија ќе се прошири и на цивилните владини претставници кои ќе соработуваат за враќањето на уставниот поредок”, рече венецуелскиот парламент.
Предлог-законот предвидува амнестија на 75 затвореници кои се противници на владата на Мадуро, како и на луѓе кои живеат во самонаметнат егзил поради нивното отпор кон актуелниот лидер на Венецуела.
