Македонските кошаркари низ квалификациите не успеаја да изборат пласман на Европското првенство кое наредната година ќе се одржува во Израел, Финска, Романија и Турција.
Во квалификациската група Македонија со скор од две победи и четири порази го освои претпоследното место, што предизвика шпекулации дека кошаркарите можат да се преселат во Б дивизијата.
Во средата, ФИБА, се огласи со соопштение, дека оние 16 селекции кои не изборија пласман на Европското првенство, наредното лето, ќе играат предквалификации, а најдобрите осум ќе бидат вклучени во квалификациите за пласман на Светското првенство во 2019 година.
Квалификациите ќе се играат од 2. до 19.август, а покрај Македонија ќе играат селекциите на Австрија, Холандија, Данска, Швајцарија, Кипар, Босна и Херцеговина, Естонија, Белорусија, Шведска, Португалија, Словачка, Бугарија, Косово, Албанија и Луксембург.
