Контроверзен духовен водач од Индија беше осуден на доживотен затвор за убиството од 2002 година на новинарот што ја разоткри сексуалната злоупотреба во неговата секта.
Гурмеет Рам Рахим Синг, водачот на духовната организација „Дера Саша Сауда“, во четвртокот ја прими казната преку видеолинк во затворот каде што отслужува 20 години затвор за силување две жени следбенички.
Синг, заедно со уште неколку свои помошници, беше осуден за убиство и заговор, но тој и понатаму е влијателна фигура во Индија, со огромен број следбеници, пишува Си-ен-ен.
Веб-страницата на организацијата „Дера Саша Сауда“ ја опишува како несебична социодуховна организација, која има ашрами во 10 држави и синдикални територии во Индија и тврди дека има милиони следбеници во целиот свет.
Во 2002 година Рам Чандер Чатрапати, уредникот на дневниот весник „Пура Сач“, беше застрелан и убиен по објавувањето анонимно писмо од една од следбеничките на Синг. Во писмото се опишува сексуалната злоупотреба што се одвивала во организацијата.
Во 2017 година синот на Чатрапати рече дека убиството на татко му е директен резултат на објавувањето на писмото велејќи дека заканите почнале да пристигнуваат веднаш потоа.
