Бебе од Босна доби нов почеток благодарение на кардиозафат во Турција.
Адијан, кој е стар само 43 дена, роден со конгенитална срцева мана, беше успешно опериран во болница во Истанбул. Врз Адијан беше извршена петчасовна операција на артериите.
Кардиологот Тајар Сариоглу во четвртокот изјави за агенцијата „Анадолија“ дека поради срцевата мана, Адијан имал проблеми со дишењето. Сариоглу додаде дека тимот на кардиолози извршил т.н. свич (анг. switch) на артериите околу срцето на бебето.
„Тој е сега бебе со нормално срце. Ако не го опериравме навреме, ќе умреше. Со ова тој доби нов живот,“ изјави Сариоглу.
Специјалистот рече дека за време на операцијата, неговиот тим го сопрел срцето на Адијан во времетраење од еден и пол час.
Сариоглу додаде дека лекарите во Турција имаат големо искуство со овој тип срцеви зафати затоа што кај нив често доаѓаат пациенти од околните земји на Блискиот Исток, централна Азија, како и од Балканот, Русија, Украина и од Кипар.
Медине Кариман, мајката на бебето, рече дека Адијан е во одлична состојба.
„Им благодарам на докторите што ја извршија операцијата, како и на медицинскиот персонал и сите што неуморно се грижеа за моето дете. Кога ќе порасне, ќе му раскажам за Турција и за грижата што ја доби во оваа болница“, изјави Кариман.
Адијан и мајката во вторникот се вратија во Босна и Херцеговина.
