Кошаркарите на МЗТ добија жешка шлаканица од белградски Партизан во рамките на второто коло, во регионалната АБА лига. По убедливиот пораз од Црвена ѕвезда, МЗТ претрпе дебакл против Партизан 62-93 (16-29, 9-19, 21-22, 16-23).
МЗТ најави борба за горниот дел од табелата (пласман помеѓу шестото и осмото место) пред почетокот на АБА лигата, но по воведните две средби, јасно е дека Емил Рајковиќ и неговите избраници ги очекува жестока работа доколку сакаат да ги исполнат прогнозите.
По убедливоот пораз во петокот од Црвена ѕвезда, МЗТ како домаќин беше прегазен од Партизан 62-93.
МЗТ одигра катастрофално во одбраната, а во нападот владееше вистинска анархија, без јасна поставеност на нападите, сѐ се сведуваше на индивидуални акции. МЗТ катастрофално шутираше од поле, 36 отсто за два и само 13 отсто за три (4/30).
На спротивната страна екипата која од клупата ја предводи поранешниот македонски селектор Александар Џикиќ, со јасна цел и план влезе во натпреварот, одбраната гранитна, а нападот го водеше одличниот Хачер.
Концепцијата на МЗТ, Партизан ја растури уште во првата четвртина кога со серија од четири тројки прв пат стекна двоцифрена предност (9-20). Од тој момент „црно белите“ константно ја зголемуваа предноста, плус 23 на полувреме (25-48), а во еден момент во последната четвртина разликата изнесуваше 38 поени.
Партизан погоди 11 тројки од 23 обиди, а за два поени реализираше 69 отсто од обидите.
Тејмс со 20 поени и Мејси со 15 поени и 12 скокови единствени заслужија преодна оценка кај МЗТ, додека Партизан го предводеше триото Хачер со 21, Бирчевиќ со 19 и Маринковиќ со 16 поени.
Наредниот меч МЗТ ќе го одигра веќе в четврток, кога во Загреб ќе гостува кај Цедевита, а Партизан ден подоцна ќе ја пречека Цедевита.
