Сенди Џилет од Австралија го видела својот сопруг 10 години откако исчезнал од нивниот дом во Мелбурн, пренесува „Индепендент“.
Таа последен пат го видела Расел Џенкинс во септември 2006 година, кога после една расправија отишол во Вериба, гратче во близина на Мелбурн. Мажот никогаш не се вратил, оставајќи ја сопругата со нивните две деца, четиригодишниот Итан и двегодишниот Чарли.
Расел официјално е прогласен за исчезнато лице, а полицијата никогаш не му влегла во трага.
Во текот на оваа година, госпоѓата Џилет заедно со децата се наоѓала на паркинг на еден шопинг центар во Саншајн Коуст – околу 1.600 километри оддалечен од нивната куќа – кога во еден автомобил го забележала својот сопруг.
„Секогаш верував дека е тука некаде. Но прилично се шокирав кога го видов. Не знам ни сама како да го објаснам тоа чувство – тоа што го видов целосно ме зашемети“ – изјавила за „news.com.au”.
„Бевме многу блиску. Не знам дали сфати дека тоа сме ние, но самото сознание дека го видов после толку време беше неверојатно. Можеше да ни пријде, но што би му рекле на некој што не бил во вашиот живот 10 години? – додаде таа.
Сенди наведува дека единствената причина поради која се одлучила јавно да ја изнесе својата приказна е тоа што нејзините деца не го виделе и слушнале својот татко ниту еднаш откако ги напуштил.
