„Некои смокви и маслинки се исушија, а мојата банана преживеа ниски температури минатата зима, без никаква заштита. Тоа е затоа што без проблем може да издржи температури до минус 30, кажа Драган Мариновиќ (56), кој во Поличник во близина на Задар со брат му Невен засадил плантажа на банани на семејниот имот во 2016 година.
Првин сакале да садат смил, но Драган тогаш бил на предавање за одгледување тропски сорти, па веќе во првите минути од предавањето одлучиле да засадат пау пау-банани и по неколку садници на егзотични овошја, како што се мини киви и монголски цреши и боровинки.
Индијанската пау пау-банана има вкус што потсетува на манго, авокадо и ананас и е богата со минерали и протеини. Таа не изгледа како банана на која сме навикнати, туку плодот е зелен и има тркалезна форма и спаѓа во суперовошје поради своите лековити својства, меѓу кои е супстанцијата што го поттикнува изумирањето на клетките на ракот. Нејзините лисја, гранчиња и кората дејствуваат како природен пестицид, така што од нив се произведуваат еколошки инсектициди.
Садниците се скапи, но Мариновиќ вели дека секое дрво, кога ќе порасне, за што е потребно шест години, ќе им даде повеќе од 50 килограми банани. Според тоа, тој очекува годишен род од 21 тон за три години, без многу напор. Затоа, има намера да го прошири производството и да засади уште 24.000 садници на 30 хектари земјиште.
