Раководството на ВМРО-ДПМНЕ попладнe ќе одржи седница на Извршниот комитет, по одлуката на СДСМ да го одложи конечниот став за предвремени парламентарни избори. По седницата на Извршниот, од партијата најавуваат и состанок на Централниот комитет. На двете највисоки партиски тела ќе се разговара за актуелната политичка состојба, за претседателските избори, и за барањето на партијата за предвремени парламентарни избори.
Од ВМРО-ДПМНЕ додаваат дека власта ја носи државата во голема бездна.
„По фијаското и целосната капитулација со името и промената на идентитетот, Владата, како што гледаме, се впушти во нова трка на лажење на јавноста со измислени бројки, сакајќи да ја покрие целосната капитулација во економијата“, велат од опозициската партија.
Во петокот вечерта заседаваше Централниот одбор на СДСМ и донесе одлука да го овласти највисокото раководство на партијата да „пресече“ дали заедно со претседателските избори ќе се организираат и предвремени парламентарни избори. Тоа се очекува да се случи во наредните две недели кога ќе се одржи состанокот на Извршниот одбор на СДСМ. Во однос на претседателските избори од владејачката партија најавија дека на 3 март ќе го соопштат името на кандидатот за претседател на државата.
Претседателскиот кандидат на ВМРО-ДПМНЕ, пак , ќе се избере на Конвенцијата закажана за 16 февруари во Струга.
