Седницата, на која на дневен ред се пратенички прашања, собранискиот спикер Талат Џафери ја отвори на албански јазик. На ова реагираа од ВМРО-ДПМНЕ, од каде што велат дека Џафери постапува спротивно на Уставот и Деловникот.
„Сведоци сме дека брзате, кршејќи ги процедурите, да го ставите Законот за јазиците во употреба, а тоа е спротивно на член три 3 од Деловникот, каде што стои ‘службен јазик е македонскиот и неговото кирилско писмо’“, рече координаторот на пратеничка група на ВМРО-ДПМНЕ, Никола Мицевски, и побара да се почека одговорот од Уставниот суд, каде што е поднесена иницијатива за оценување на Законот за јазиците.
Џафери на албански јазик возврати дека постапката пред Уставен не значи замрзнување примена на законот. Тој потсети дека законот е изгласан уште во јануари 2018 и дека поминала цела година и дека е јасно оти е веќе во употреба.
„Јазикот служи да се разбереме, поважно е да носиме закони во интерес на сите граѓани отколку на кој јазик ќе биде тоа, ние како владејачко мнозинство имаме иста цел – подобар живот за сите, концептот за едно општество е на здрави нозе“, рече координаторот на СДСМ, Јован Митревски.
Џафери првпат ја води седницата на албански јазик откако стапи во сила Законот за јазиците. Неговото 0бразложение зошто веднаш не почнал да ги води седниците на албански јазик по донесувањето на законот, беше дека чекал техничка подготвеност на собраниските служби, но ниту денеска не е обезбедена можноста за снимање директно на Вториот канал од галеријата од каде што медиумите ги следат седниците.
