Илјадници обожаватели од вторникот ѝ оддаваат почит на кралицата на соулот, Арета Френклин, поминувајќи покрај нејзиниот одар во детроитскиот Музеј на афроамериканската историја „Чарлс Х. Рајт“.
Во вторникот отворениот златен ковчег со телото на легендарната пејачка е поставен меѓу букетите розови и виолетови рози, а обожавателите ќе може да ѝ оддадат почит и во наредните два дена.
Телото на кралицата на соулот, која почина на 16 август од рак на панкреасот на возраст од 76 години, е пренесено до Музејот во класичен бел олдтајмер од 1936 година.
Според организаторите, цветовите се одраз на нејзината љубов кон обожавателите, но и склоноста кон високата мода. На нозете дивата има црвени чевли со високи потпетици, а на усните виолетово-црвен кармин. Нејзиниот црвен фустан го симболизира нејзиното членство во сестринството „Делта сигма тета“, кое се бореше за правата на афроамериканските жени.
Многубројни фанови пред да го донесат ковчегот спиеле на улиците за да ја испратат својата омилена пејачка. Некои патувале стотици километри за да ѝ оддадат почит.
В четврток ковчегот ќе биде однесен во црквата каде што служеше нејзиниот покоен татко, кој беше пастор.
Погребот ќе се одржи на 31 август и на него ќе присуствуваат членовите на семејството и пријателите на Арета од целиот свет. Погребот ќе биде затворен за јавноста.
Текстот (Видео) Фановите се простуваат од Арета Френклин, која лежи во златен ковчег е превземен од МАКФАКС.
