Безбедносната состојба во Валандово е стабилна и поволна, како впрочем и на целата територија на државата. Имаме подобрување на безбедноста, а тоа го кажуваат и граѓаните, рече министерот за внатрешни работи, Оливер Спасовски, по денешната посета на полициската станица Валандово, повикувајќи се на последната анкета на ОБСЕ според којa 75 отсто од граѓаните се изјасниле дека се чувствуваат безбедни.
Во полициската станица Валандово министерот разговараше со раководството, но и вработените за прашања што ја засегаат работата и делокругот на задачи на полициската станица, а тема на разговор биле и условите за работа на полициските службеници.
„Во изминативе година и половина јас и актуелното раководство на министерството презедовме низа конкретни активности за подобрување на статусот, на материјално-техничките и инфраструктурни услови за работа на полициските службеници. Подобрувањето на статусот и условите на работа, сфатени и како загарантирани права на полициските службеници се наш заеднички интерес, оти логиката е едноставна – само задоволен полициски службеник е ефикасен и професионален полициски службеник“, рече Спасовски.
Министерот кажа дека за набавка на нови униформи предвидени се нови, околу 200 милиони денари, а предвидено е и зголемување на платите за пет проценти.
Посочи оти за 2019 година предвидени се 70 милиони денари и за реновирање на полициските станици, а меѓу предвидените објекти за реконструкција е и полициската станица во Валандово.
На средбата со градоначалникот на Валандово, Перо Костадинов, беше констатирано дека соработката меѓу полицијата и локалната самоуправа во Валандово е одлична, но се разговараше и за сегменти каде таа може да биде уште подобра.
