Бранот на екстремни температури повеќе од една недела создава проблеми за Австралија. Повеќето дневни температури достигнуваат речиси 50 степени Целзиусови.
Температурите рушат стогодишни рекорди – минатата недела дури пет дена биле меѓу десетте најтопли во историјата на континентот.
Екстремните температури и суши исто така доведоа до масовно изумирање на животни. Прво, се појавија информации дека повеќе од еден милион мртви риби се насукале во крајбрежните области. Потоа медиумите објавија дека топлината за само два дена убила дури една третина од лилјаците во Нов Јужен Велс.
Австралија не се сеќава на ваква топлина и суша, а доказ за тоа е и фактот што во изминатите неколку дена дошло до масовно умирање на диви коњи.
Чувари на парк во близина на Алис Спрингс вчера пронашле повеќе од 90 мртви, изгладнети и дехидрирани диви коњи. Уште 200 биле пронајдени во екстремно тешка состојба и биле еутанизирани.
Еден од жителите, Ралф Тарнер, објави ужасни фотографии од мртвите коњи.
Друг жител, Рохан Смит, за Би-би-си изјавил дека во областа каде што се пронајдени мртвите коњи се наоѓа езеро. Коњите пиеле вода од ова езеро, но тоа пресушило и тие останале без извор од кој ќе ја гасат жедта.
Мештаните и чуварите во паркот за Би-би-си рекле дека поради топлината во оваа област магариња, па дури и камили умираат од жед.
Од друга страна, метеоролозите немаат добри вести – најавуваат дека високите температури ќе продолжат и во наредните денови.
