Повеќе десетици луѓе се уапсени, а најмалку двајца починаа во притвор во текот на последната акција против ЛГБТ-заедницата во Чеченија, велат чеченските активисти, а пренесува „Си-ен-ен“.
Околу 40 мажи и жени беа уапсени во последните неколку недели поради „нов бран на прогон”, рече Игор Кочетков, шеф на групата за права на руската ЛГБТ-заедница.
Тој додаде дека „најмалку две лица загинаа при тортурата”. Кочетков рече дека властите се одговорни за притворот и дека активистите се затворени во градот Аргун.
„Локалната полиција прави сé што може за да ги спречи активистите да го напуштат регионот или да се обратат на судот поради кршење на нивните права”, рече Кочетков.
“Им ги одзема документите, им се заканува со кривични постапки против нив или на лица што им се блиски, и ги присилува да потпишат празни обрасци”, додаде тој.
Според информациите од руската ЛГБТ-заедница, нов бран притвор на активисти на ЛГБТ започна пред неколку недели откако бил уапсен администраторот на групите за правата на хомосексуалците во руската социјална мрежа ВКонтакте.
Во 2017 година, во Чеченија е спроведена брутална акција против хомосексуалните лица. Стотици беа уапсени и мачени во притвор.
Апсењата предизвикаа остри меѓународни критики за Русија. Но чеченскиот лидер Рамзан Кадиров рече дека во неговата република нема хомосексуалци, и ако ги има, тие треба да бидат протерани од регионот.
