Отстранувањето на коцкарниците од градовите е само фарса зад која се крие обид нови бизнис-групи да ја присвојат дејноста без да плаќаат данок кон државата, велат луѓе кои се занимаваат со истиот бизнис, но сакаат да останат аноними. Нивниот став е дека со измената ќе се затворат сегашните објекти како обложувалници и коцкарници, за да се отворат нови кои ќе бидат он-лајн.
„Онлајн обложувањето го има и сега, а сопствениците не плаќаат данок кон државата. Со затворањето на нашите објекти, коцкањето нема да се искорени, туку ќе се пресели на интернет, а ќе ќарат бизнисмени кои немаат никакви давачки кон државата“, вели нашиот извор.
Дислокација на обложувалниците и казината бараат верските заедници и пратеници на ДУИ преку законско решение. Нивното барање е во радиус од 500 метри воздушна линија од училишта, градинки, факултети и други образовно-воспитни установи да нема објекти за игри на среќа. Ако се усвојат измените на законот за дислокација на објектите, обложувалници и коцкарници ќе можат да се отвораат само на периферијата од градот, како автопатиштата.
Предлогот на ДУИ го поддржаа Македонската православна црква и Исламската верска заедница. Од МПЦ сметаат дека последицата од лесно добиени пари преку коцкањето било наркоманија и растурање на семејствата. ИВЗ не ја образложи поддршката.
Бизнис-заедницата реагира токму и на поддршката од верските заедници. Јавноста, пак, вели дека станува алармантно како религијата се меша во работи кои не се во нејзин домен.
„Религијата и младите се параван, а невини луѓе се користат за да се оствари нечиј бизнис-интерес. Зошто не реагираат на танчерките кои наводно легално работат или, пак, на проституцијата, туку најголема пречка им се казината и обложувалниците?“, прашуваат бизнисмените.
Алармот за дислокација на обложувалниците го кренаа тетовчани, оти утврдиле дека во градот има околу 30 казина и 140 спортски обложувалници.
Премиерот Зоран Заев по Нова година рече дека вака не може да остане, но оти одлуката ќе се донесе по сериозна анализа.
Од први годинава се затворија и преселија надвор од градовите, сите казина и обложувалници во Албанија, оти според премиерот Еди Рама така се переле пари од криминалот.
