Авторката на романот „Педесет нијанси сива“, Ерика Леонард Џејмс (55), наскоро издава нова еротска книга што ја најавува како „Романса на Пепелашка за 21 век”.
Романот ќе се вика „Мистер“, а во Велика Британија и Северна Америка на полиците на книжарниците ќе се најде на 16 април, извести нејзиниот издавач „Винтаж букс“.
Дејството се одвива во Лондон и во источна Европа и е фокусирано на приказната за англиски аристократ што го заведува мистериозна, музички талентирана млада жена, која неодамна пристигнала во Англија, открива издавачот.
Трилогијата „Педесет нијанси сива“ на Џејмс беше објавена во 2012 година. Таа веднаш стигна на врвот на листата на најпродавани книги во светот со продадени 150 милиони примероци. Филмското студио „Јуниверзал пикчрс“ сними три филма според романите, заработувајќи повеќе од една милијарда долари на глобалниот пазар.
Филмовите што наскоро добија етикета „порнографија за мајки” и привлекоа поголем дел од женската публика, веднаш поттикнаа бројни дискусии за границите меѓу еротиката и сцените на емоционална или сексуална злоупотреба.
Сè уште не е познато дали според новиот роман ќе се сними и филмска верзија.
